لن أنسى ابدآ عندما دخل على فى العيادة من عدة سنوات، إنسان يختلط ملامحه الظاهرية بين الإنثى و الذكر، وسألت بقبول واحترام،
ماذا تفضل أن أناديك ، إنتى أم انت؟
وبكى بشدة وانفطر قلبى مع بكاءه، وقال أول مرة شخص يسألنى هذا السؤال..ثم جاء لى بأخت له كى أشرح لها موقفه وإنه لايتشبه بالاناث كما تظن.
الترانس يعانوا من صراعهم الداخلى لقبول وإعلان ما يشعرون به من احتياجات نفسية واجتماعية، ومواجهة الأسر ورفض المجتمع أيضا،
احترموا معانتهم ورغبتهم في القبول والاحترام،”
د.الفت علام. استشارى العلاج النفسي والإدمان
مين هما العابرين جنسيا؟
العابرون جنسيا هما أشخاص عندهم اضطراب في الهوية الجنسية أو بمعنى أبسط أنهم ناس بيحسوا أنهم موجودين في الجسم الغلط، يعني تبقى ذكر بس جسمك أنثى أو العكس … مش بس على مستوى تفكيرك، ده كمان على مستوى سلوكك وتصرفاتك.
طب يا ترى ده بيحصل ليه؟ ويا ترى دي حاجة باختيار الشخص ولا غصب عنه؟
العلماء درسوا الموضوع ده لفترات طويلة، في البداية كانت أغلب النتايج اللي توصلوا ليها أنها بسبب جيني، زي مثلا الجينات SRY واللي بتلعب دور رئيسي في التطور الجنسي للذكور ومن غيرها ممكن يبقى الجنين وراثيا ذكر (عنده الكروموسومات XY ) بس عنده جسم أنثوي. ونفس الموضوع في حالة الإناث (عندها الكروموسومات( XX بس بيتطور الجسم في شكل أنثى لو مفيش الجينات SRY، وحالات كتير منها مثلا الذكور اللي جيناتهم بتكون XXY أو الإناث اللي بتبقى جيناتهم X بس
تقدروا تعرفوا أكتر عن الأسباب الجينية من اللينك ده https://bit.ly/2VWR53E
طب يا ترى الأسباب الجينية هي السبب الوحيد لحالات اضطراب الهوية الجنسية؟
ما بين سنة 1995 و 2000 ، قرر فريقين مستقلين من الباحثين أنهم يفحصوا منطقة من الدماغ اسمها Bed nucleus of the stria terminalis (BSTc) ، في الحالات العادية حجم المنطقة دي في الذكور بتكون أكبر مرتين وأكثر كثافة في الخلايا مقارنة بالإناث وبالتالي كانت علامة تقدر تفرق بيها بين الدماغ الذكوري ولاأنثوي وعليها قرروا يفحصوا دماغ الذكور والإناث العابرين جنسيا عشان يشوفوا تكوين دماغهم يشبه نوعهم اللي اتولدوا بيه ولا النوع اللي اختاروه … وهنا كانت المفاجأة
الفريقين اكتشفوا أن المتحولين جنسياً من الذكور إلى الإناث كان عندهم BSTc أقرب إلى حد كبير إلى الإناث منهم للذكور في الحجم وكثافة الخلايا ، وأن المتحولين جنسياً من الإناث إلى الذكوركان عندهم BSTcs أقرب للذكور وانتهت الدراسة بتأكيد قاطع أن العابرين جنسيا بيتولدوا بأدمغة أكثر شبهاً بالجنس الذي بيحددوه مش بالجنس اللي بيحدده نوع جسمهم.
يعني الموضوع مش اختيار … العابرين جنسيا طبيعتهم كده ومفيش حاجة يقدروا يعملوها في الموضوع ده
مش بس كده خد عندك دي كمان كلها أسباب بيولوجية لاضطراب الهوية الجنسية
حالة نقص 5-alpha reductase بتخلي الإناث يطلعلهم أعضاء جنسية ذكرية خلال فترة البلوغ
متلازمة عدم حساسية الأندروجين بتؤدي لحالات الجنس المزدوج، وفي الحالات دي الشخص بيكون جينيا ذكر لكن جسمه مقاوم للهرمونات الذكرية، وساعتها بنلاقي ليه بعض أو كل السمات الجسدية للمرأة بس تركيبه الجيني بيكون ذكر
لينك لدراسة من جامعة هارفارد عن أسباب اضطراب الهوية الجنسية https://bit.ly/2od9oFi
طب ايه الاجراءات اللي مفروض العابرين جنسيا يعملوها لتصحيح جنسهم؟
الخطوة الأولى هي مرحلة التشخيص، ودي بتتم عن طريق الأطباء واللي لازم يشخصوا الحالة على أنها حالة اضطراب هوية وده بيتم بشكل علمي زي مثلا الاستناد للبروتوكول المتبع في الدليل التشخيصي والإحصائي للاضطرابات العقلية التابع للجمعية الامريكية لعلم النفس (DSM-5)، وهو دليلٌ يستخدم لتصنيف الأمراض العقلانية.
ويا ترى ده ايه أهميته بالنسبة للعابرين جنسيا؟
في الحقيقة ده أهم جزء، لأنه مش بس عشان ضمان الحصول على الرعاية الصحية، لكن كمان عشان يضمن أنها حالة اضطراب هوية جنسية فعلا.
بعد كده مرحلة العلاج النفسي، وتقديم المشورة، وفيها بيقيم الدكاترة النفسيين مدى استعداد الشخص لعملية تصحيح الجنس.
بعد كده بتيجي مرحلة العلاج الهرموني وعملية تصحيح الجنس، والعلاج الهرموني ده بياخد كذا سنة.
ده لينك فيه تفاصيل عن الاجراءات الطبية لتصحيح الجنس: https://bit.ly/2VRq6Xg
《أزمات الهوية من اشرس الأزمات النفسية على الاطلاق و بالاخص أن كانت الأزمة في غربتي عن نوعي و جنسي و حرب بين جسدي و نفسي/ منظوري الداخلي عن نفسي وما يراه الآخرين عني..
” انا في الجسم الغلط” جملة موجعة سمعتها كثيرا من من يعاني من اضطراب في الهوية الجنسية…اذن فقرار العبور ‘للجسم الصح’ قرار يعني مواجهة عالم يرفضني ولا يفهمني بشجاعة عالية و مرونة نفسية حقيقية للتعام مع أفكار مجتمع لا يراني انثى صحيحة أو ذكر صحيح لا قبل عبوري أو بعده…
من واقع خبراتنا مع العابرات/ين نرى أن معاناتهم عميقة ومتعددة الابعاد و هم في حاجة لا فقط للدعم النفسي لكن الاهم للقبول المجتمعي وحملات للفظ ‘الوصمة’ المجتمعية التي تعد المرض الأكثر خطورة عليهم..العابرات/ين من أكثر فئات المجتمع عرضى للخطر و وجب حمايتهم و الدفاع عن حقوقهم الإنسانية و القانونية و سلامتهم الجسدية و النفسية…》
د.سالي توما طبيبة نفسية و اخصائية العلاج المعرفي السلوكي
طب العابرين جنسيا في مصر المفروض يعملوا ايه؟
الحقيقة أن مفيش قانون في مصر بينظم موضوع التصحيح الجنسي، القرارات في ايد لجنة تابعة لنقابة الأطباء ،اسمها لجنة تصحيح وتحديد الجنس،اتعملت بقرار من وزير الصحة سنة 2003، اللجنة بتتشكل من سبعة أعضاء، منهم أساتذة علم نفس وأمراض ذكورة وعلم وراثة وغدد صماء، وعضو من نقابة الإطباء، وهو رئيس اللجنة وكمان عضو من دار الإفتاء المصرية.
اللجنة دي بتسهل حاجتين: أولا إجراء عملية تصحيح الجنس على نفقة الدولة وثانيا بتسهل إجراءات تحويل الجنس في الأوراق والمستندات الرسمية.
لينك القرار: https://bit.ly/2Fe6hnD
طب لحد دلوقتي كويس أهو، فعلا في أمل أن الناس اللي محتاجين تصحيح جنسهم يقدروا يعملوا كده
الحقيقة أن الواقع بيقول غير كده ، عشان ايه … عشان عضو لجنة الإفتاء بطل يحضر اجتماعات اللجنة من نهاية 2014 وده خلى اللجنة تتوقف عن العمل لحد ما حصل اتفاق مع مفتى الجمهورية لعودة عمل اللجنة في أواخر 2017 ولحد دلوقتي في مرضى كتير متعلقين ومش عارفين يعملوا حاجة
لينك اتفاق اللجنة مع المفتي: https://bit.ly/2Fe7qvr
طبعا في عصر الانترنت بدأت القضية تظهر بشكل عالمي أكتر وتاخد حيز اهتمام ودول كتير شرعت ده زي الأرجنتين واللي شرعت قانون للاعتراف بتغيير النوع الجنسى سنة 2012، نص على تمكين كل من هو فوق سن 18 من اختيار هويته الجنسية وتغيير نوعه الاجتماعى وتعديل وثائقه الرسمية، دون أى موافقة قضائية أو طبية مسبقة.
لينك عن الدول اللي بتشرع عمليات تحويل الجنس: https://bit.ly/2JfR8Gp
طبعا كتير بدأوا يتساءلوا مين هما العابرين جنسيا قضية ملك الكاشف واللي تم القبض عليها واخفائها قسريا لحد ما ظهرت في نيابة أمن الدولة السبت اللي فات وخدت 15 يوم حبس على ذمة قضية مظاهرات محطة رمسيس والدوشة الكبيرة اللي حصلت عشان ما تروحش سجن الرجالة وهي عاملة عملية تحويل جنس من ذكر لأنثى
افرجواعن ملك الكاشف
اول مرة سجنت كإمرأة في جسم رجل وسجنت ثانيا عندما لم تعترف بها الدولة كإمرأة وسجنت ثالثا عندما اضطهدها الناس لكونها امرأة في جسم رجل وسجنت رابعا لانها دخلت السجن وسجنت خامسا لانها وهي المرأة سجنت مع الرجال
د.نبيل القط استشاري الطب النفسي ..الطبيب المعالج
لينكات عن قضية ملك الكاشف: https://bit.ly/2Fd1bIn
وفي النهاية أحب أقول أن اضطراب الهوية ازمة نفسية ، مهم كلنا نساعد الشخص انه يقدر يعيش بشكل طبيعي في الجسم اللي هو حاسس به ومرتاح معاه وياخد فرصة للأمل والحياة